متن نوحه ترکی علی اصغر از زبان رباب
متن نوحه ترکی علی اصغر از زبان رباب
زبانحال حضرت زینب (س)
نی کیمی گلمه بیله ناله و افغانه رباب
آغلاما توکمه گوزون یاشینی دامانه رباب
گون قباقینده بیله ناله و افغان اِیلمه
توکمه قان یاش یوزیوه باغریمی القان اِیلمه
نار حسرتله دل عالمی سوزان اِیلمه
اود سالور سوز و گدازین دل سوزانه رباب
عالمین جانی فدا اولسون علی اصغریوه
ممکن اولسا بو آغارمیش ساچون آل اللریوه
طلب صبر اِیله حَقدن سن ئوزون غملریوه
قورخورام کشتی عمرون دوشه طوفانه رباب
باشیوین درد و بلاسی بولورم چوخ چوخیدی
گَتیرن ناله و افغانه سنی بیر اوخیدی
دئمورم بیله خیال ایله که اصغر یوخیدی
اصغرین درد و غمی گَتدی سنی جانه رباب
سعی ایله یادیوه سالما بالاوین آغلاماقین
خاطریندن چیخا تا اللرینی باغلاماقین
داغلیور قلبیمی نینیم که اورک داغلاماقین
غملر آز قالدی ویره عمرومی پایانه رباب
جاندان آرتوق سوور عالمده آنا ئوز بالاسین
اودور اوخلانسا بالا یاندیری دلدن آناسین
سعی ایله یادیوه سالما بالاوین اوخ یاراسین
باغریوی دوندروری اوخ یاراسی قانه رباب
تا او اوخ چیخدی کماندان فلکه سالدی شرر
قانلی میداندا خدا بولدی حسین چکدی نَلر
او اوخا اوخ دئماق اولماز، ولی واردور بو قَدر
یانار اود سالدی او دم عالم امکانه رباب
ظاهراً دگدی او دم حنجر عطشانه او اوخ
باطناً دگدی ولی ناطق قرآنه او اوخ
گَتدی قرآنی او دم ناله و افغانه او اوخ
گولدی هر چند که اصغر سولی پیکانه رباب
باخدی اوخ یاره سینه اِیتدی حسین آه و نوا
اوجونی قانیله دولدوردی شه کرب و بلا
قرمزی رنگه بویاندی او زمان عرش خدا
تحفه گوندردی آخان قانینی جانانه رباب
صورا یوز دوتدی خیامه طرف اول جان جهان
خیمیه ساری گوتوردی قدم اما نگران
سَسلیوردی باجی جان اصغر اولوب تیره نشان
ویر خبر آغلیا قان ، تشنه بو قربانه رباب
خیمیه گلمدی اصغرله اگر شاه کُبار
اِیستمیردی تاپا اَل اصغریوه قوم شرار
پشت مخیمده اودور قازدی او قربانه مزار
دفن اِیدوب آغلادی شدتله او عطشانه رباب
آز زمان چکمدی اولدی بو اِیشین سرّی عیان
دگوری لازمه شرحین اِیلیم بیرده بیان
آختاروب تاپدی علی اصغریوی شمر و سنان
کائنات آغلادی اول غنچه خندانه رباب
کیم دیر که او ولایتده اورک داغلامادوخ
یا او صحراده دوینجا بالاوا آغلامادوخ
او گیجه شام غریبان مگر ساخلامادوخ؟
گلدی حتی که آنام شام غریبانه رباب
نجّه بیر جرعه سو آرتیردی اورک غملریوی
اورکون باشینه باسمشدون او دم اللریوی
داده سسلوردون او صحراده علی اصغریوی
اود سالوردی نفسون کوه و بیابانه رباب
باقی عمریوی سعی ایله بو عالمده (#عتیق)
گِتمیه فوته اوتور اِیله بیر آز فکر عمیق
خامه و دفتریوی دوت ئوزیوه یار شفیق
تاپشورا تا سنیده حضرت جانانه رباب
گیجه گوندوز خانمون نیسکلینی یادیوه سال
نوحه یاز آغلا علی اصغره ، اول غرق ملال
چله ساخلا شه بی یاره خانمدان صله آل
دنه باخ اصغره خاطر بو نوا خوانه رباب
در احوالات حضرت رباب (س)
یوخ اعتبار ذرّه بو دنیای فانیه
بیهوده دور کیم عشق ایده دورِ زمانیه
فرمایشِ حسیندی بو سوز دقّت ایلیون
مشتاقسوز اگر سخنِ صادقانیه
اولسیدی بو جهاندا اگر مِهر و عاطفه
یحیا باشین قباقه قویانمازدی زانیه
آختارمیون صفا بو پُر آشوب دهرده
دریای غصّه دور یولی یوخدور کرانیه
اولسیدی اگر صفا ، دیشی سینمازدی خاتمون
قیلمازدیلار جفا او گُلِ جاودانیه
فرصت تاپوب عدالت الین باغلادی زمان
زهرا دوشوبدی نایرهء ظلمِ ثانیه
باغلانماسیدی ظلمله شیرِ خدا الی
قنفذ نجه آتاردی الین تازیانیه؟
کرب و بلایه چک سوزی ای طبعِ نکته سنج
دُرّ سخن گزورسن اگر گیت خزانیه
بیر کلمه سوز یازیب ایله بو دهردن سؤال
نسگل اولا سوزون مللِ هفتگانیه
اصغر کیمه اوخ آتمیشیدی؟ ظالم حرمله
چیخدی عوض بوغازینی قویدی نشانیه
علّت اودور ئولنه کیمین آغلادی رباب
نفرت گوزیله قیلدی نظر زندگانیه
کسدی همیشه سایه لی منزلدن الفتین
گوزدن سرشگینی اَلَدی صحنِ خانیه
هی یالوارادیلار ائوه گَل چولده آغلاما
تپراق قونوبدی زلفیوه حسرتدی شانیه
صحن سراده قالما یورولموش هما کیمین
آخر هما یورولسا گلر آشیانیه
کاشانیه گتیر بالاوین گاهواره سین
ترپدیقیجا اوخشاما دئ گَل ترانیه
لای لای چال اصغره سسیوه بیزده سس قوشاخ
ماتم توتاخ چوخ ایستدیقین نازدانیه
آرامیوی آلیبدی گونوزلر گون ایستیسی
حسرتدی گوزلرین گجه شمعِ شبانیه
وار خواهشیم دیردیکی اوز ویرمیون منه
دردیم اورکده چوخدی اسیرم زمانیه
اوغلی ئولن ، ائوی یخیلان ، نیلیری ائوی؟
من طالبم قویام یوزومی آستانیه
نه بستره واریمدی علاقه نه مسکنه
گر قصر اولا یریم گینه فرق ایلمز منه
دیلده ایدوب اوغول آدین ازبر من آغلارام
هر سوز باشی دیوب علی اصغر من آغلارام
نفرین ایدین او شخصه کی اوخ نقشه سین چکیب
ایلوب آنالاری قره معجر من آغلارام
بیر اوخ منیم عوض ایلدی سرنوشتیمی
عمروم گر اولسا تا دمِ محشر من آغلارام
قبره یارالی گئتدی کبوتر کیمین بالام
گورسم اگر یارالی کبوتر من آغلارام
دشت ِبلاده بیر ملر آهو ایتیرمیشم
نیلوم غزالیمی اورک ایستر من آغلارام
تک اوخ دگل ، سوداندا واریمدی گلایه چوخ
هر سو ایچنده قلبی مکدّر من آغلارام
گورسم سودان چیخان بالیق آغزین آچیر یومور
حتما” بو قلبیمه اثر ایلر من آغلارام
صیّادیلر یارالاسا آهو بوغازینی
دیلسیز یارالی اوغلوما بنزر من آغلارام
گهواره اولدی قبری ، تراب اولدی بستری
سالسا آنالار اوغلونا بستر من آغلارام
نیلوم اورک اوتون گینه گوزیاشی سوندورور
کور اولسادا بو اشگیلی گوزلر من آغلارام
صحنِ سراده جان نقدر چیخمیوب وارام
ناله سسیمنن اینجمه سوز من یورولمارام
باشین آغاتدی ویردی باشا قاره گونلرین
پروانه وار عشق اودی یاندیردی شهپرین
نه استراحت ایتدی نه ایچدی سرین سودان
نه شانه گوردی زلفی نه هوردی هوروکلرین
صبحون زمانی زینب او گنجینیهء وقار
دوردی نمازه عشقیله ترک ایتدی بسترین
صحن ِسرایه قویدی قدم دستماز آلا
گوردی رباب اوخشامیری دیلسیز اصغرین
خاموش اولوب گیدوب یوخیا گلمیری سسی
یوز قبله ده چکیب یوزونه قاره معجرین
دیسکیندی زینبین اورگی سسلدی رباب
سس گلمینده بیر بیرینه ووردی اللرین
فورا” اوزون یتوردی اونون باشی اوستونه
قویدی یوزون سولان یوزونه ترپَدّی پیکرین
گوردی محالیدور اویانا گوزلرین آچا
دستِ ممات پارچالیب عمر دفترین
دینجلمین رباب ایله دینجلیب یاتیب
الدن ویریب خزانهء غم غملی گوهرین
راحت دئدی نه یاتمیسان ای بانوی حیا؟
کیم سیلدی جان ویرنده سنون آلنوون ترین
کیم سن کیمی یورولدی ملال و فشاریدن
یومدی گوزون گلایئله روزگاریدن
نسگیل لرون بو قلبیده گلمز شماریه
دوندی گوزونده محبسه دنیای عاریه
پر ووردون آتش ِغمه یاندون یورولمادون
پروانه تک هوس ایلدون سن شراریه
چوخدور غمون بو درده اما چوخ آغلارام
سوز درک ایدن کفایت ایدر بیر اشاریه
گون رنگیوی قراتدی ، گورنلر دئدی منه
قویما حیاطی ایلیه مسکن بو جاریه
آچ گوزلرون نه خوابِ عمیقه گیدوب گوزون؟
سالما فراق اودون بو دلِ پاره پاریه
اقبالیوون ستاره سی سوزموشدی لاجرم
قان آغلادون همیشه باخاندا ستاریه
گَل نطقه بیر چوخ ایستدیگین اصغره گوره
هر گونکی تک یتور الیوی گاهواریه
گر طاقتون یوخوندی سنه ایلیوم کمک
من ترپدیم سن اوخشاما دئ شیرحواریه
سوز چوخدی بو زمینه ده امّا یازانمیرام
غسل و کفن اولوب او اورک پاره پاریه
زین العباد قبره قویوبدور آناسینی
گویا بو دللریله دوتوبدور عزاسینی
ای مظهرِ محبّت و مِهر و وفا آنا
ای معدن ِعطوفت و شرم حیا آنا
ای عمرینی فنایه ویرن صحن ِخانه ده
وی اشگریزِ گوشهء صحن و سرا آنا
ای گوز یاشین سولان یوزونه زینت ایلین
باش غم دیزینده غملریله آشنا آنا
قارداشلاریندا گَلدی قویوب گتمدون بیزی
خلق ایلین اوزی سنه ویرسین جزا آنا
غملی مزاریوی اوزوه آشیانه قیل
دینجل بیر آز بو قبریده ای مهربان آنا
یادّان چیخاتمارام سنی هر قدر زِندیَم
هر گون نمازیده ایدرم من دعا آنا
گیت اصغری بهشتیده آل سینن اوستونه
روح عالمینده روحیوه ویرسون صفا آنا
سندن سو ایستمز نه صوده احتیاجی وار
زهرا آناسی حلقینه قویموش دوا آنا
یانماز چراغی حرملنون ده سونر یقین
چون انتقام وعده سی ویرمیش خدا آنا
(انور) حضورِ شه ده قبول اولسا بو سوزون
خلق آغلیاندا روزِ جزا آغلاماز گوزون.
زبانحال حضرت رباب (سلام الله)
آغلاما ای گُلِ خندانیم اوغول
نیلیوم یوخ سووا امكانيم اوغول
ای گُلِ نورسِ گلزارِ وفا
باغليوب سو یولونی اهلِ جفا
قویمیوب سَنده عطش رنگ و صفا
سارالوب سولدی گلستانیم اوغول
ای یوزی صورتِ جانانه زُجاج
هم سوسوزسان بولورم سن همی آج
نیلیوم واردی الیمده نه علاج
قوریوب هر ائیکی پستانیم اوغول
سَنَه باخدوقجا بالا اودلانورام
یوخ علاجیم ندی دردون قانورام
منده سن تک سوسوزومدان یانورام
آلشور سینهٔ سوزانیم اوغول
گوزیوه اوچ گئجه دور گلموری خواب
یورولوب خسته دی بیچاره رباب
سهلدور عمّه لرون اولدی کباب
یاندی بو جمع پریشانیم اوغول
ایلوری رنگِ رخون حالیوی فاش
ساکت اول ایلمه بیر بیله تلاش
داغلانان سینمی چوخ ایتمه خراش
بویادی اللروی قانیم اوغول
بولور عالَم بونی ای طاقتی طاق
رسم دور بو صود امر یوخلار اوشاق
بو قوری سینه او خشکیده دوداق
وار عجب حالیوه میزانیم اوغول
آغلاماقدان دوتولوب بیله سسون
یا دوشوب یوخسا شماره نفسون
تنگ اولوب طایرِ روحه قفسون
نطقه گَل مرغ ِخوش الحانیم اوغول
بالاجا گوزلرون آچ باخ یوزیمه
تا ویروم بیرجه تسلّی اوزیمه
بو نه حالتدی بالا کول گوزیمه
چخماز آخر نیه بس جانیم اوغول
گر چه چوخ گُل هامی گلشنده سولار
آچمامیش غنچه سولا مشکل اولار
سارالان رنگیوه باخدوقجا دولار
ابر تک دیدهٔ گریانیم اوغول
نسگلیم آرتار آچاندا گوزیوی
باسارام باغریما جان تک اوزیوی
قیمارام اوپماقا امّا یوزیوی
اود ویرور چون لب ِعطشانیم اوغول
اوزگه بیر شوقیله نچه آی علی
گجه گوندوز دیمیشم لایلای علی
ایمدی یانّام دیرم ایوای علی
اوجالور گوگلره افغانیم اوغول
(شأنی) بو طفل ربابون گوزیدور
دم ویرن نوحیه مطلق اوزیدور
سوز ربابوندی نه صابر سوزیدور
آغلاما ای گل خندانیم اوغول.
دیدگاه خود را بگذارید